Taammanaa Bitimaa irraa

Koloneeffattoonni Habashaa erga Oromoota garaa sonaan irra caalan dirree waraanatti, waraanaan cabsanii mowuun biyya keenya qabatanii, sodaa fi bir'annaa malee rafanii buluu hin dandeenye. Waan uummata Oromoo isa humna qawweetiin of-jala galchan san irraa sodaa hedduu cumaa tahe qabaniif, manneen kophaatti ijaarsifachuun qawwee boraafatanii rafu turani. Mannee fi gandeen isaan oggaa san ijaarsifatanii keessa jiraatan sun Afaan Ingiliziitiin "garrison town" yoo jedhaman afaan isaanii, Afaan Amaaratiin immoo "misshig" jedhama. Misshigii isaanii kanatu booda gara magaalattiiwwanitti, olee bulee immoo gara magaalaawwanitti guddachuun geeddarame. Magaalaawwan biyyoota Oromoota Gibee faa, Naqamte faa, Gidaamii faa, Harar faa fi Warra Iluu faa irraa kan hafan dirawwanii fi magaalaawwan Oromiyaa keessatti argaman hedduun "misshigoota" kana turani. Ennaa baay'ee magaalaawwn kun akka Asallaa, Gobbaa, Diillaa, Dambi Doolloo, Geedoo, Ejeree ("Addis Alam") faa tulluu yookaan tullubbee (koobii) irratti kan hundeeffamani. Jarri kun achi irratti masshagatanii Oromoo isaan marsee jiru san halkanii guyyaa bir'achaa towatu.

     Kutaa isa dabre irratti fakkeenya tokkicha qofa, naannolee Oromiyaa keessaa naannoo Afran Walisoo fudhachuun addeessineeti turre. Ammas mee waayee lafa Oromoo isa bataskaana Habashaa harka galee san, naannoodhuma kana irraa kaanee waa haa ilaallu! Nafxanyoonni moofeyyiin erga waraana Oromoo Afran Walisoo mowuun biyya qabatanii dursanii misshigii isaanii kan ijaarratan Tulluu Boddaa irratti. Warri Shaggar irraa kaatanii gara magaalaa Amboo yookaan Naqamtee deemtan, magaalaa Giincii oggaa geessan gara harka bitaa, gara kibbaa yoo ilaaltan tulluuwwan akka lakkuutti xiqqqoo wal irraa siqanii jiran agartu. Bakki tulluuwwan kanaa magaalaa Giincii irraa wantee (kiilomeetira) 20 qofaa fagaatee argama. Naannoon Afran Walisoo Bodda jedhamee beekamu kun lookoowwan Oromoon Walisoo nan qaba jedheetoo himatu saglan keessaa isa tokko. Inni kun biyya Afran Walisoo keessaa isa gara kaabaatti argamu. Lookoowwan kun duraan biyyoota abbootii duulaa sagalii turani. Abbootii duulaa kan Boddaa keessaa inni bantii tureeyyu Goobana Bixuu isa cimsee waraana Habashaa dura gore ture. Goobana Bixuu kan uummataan Abbaa Caalaa jedhameetoo beekamu, fardi farda isaa dura dhaabatu hin turre jedhama. 

     Habashoonni "keenya" biyya akkanaa fi nama akkanaa cabsaniitu Biyya Oromoo isa karaa kanaan jiru qabatani. Karaa lixaatiin waraana Walisoo kan naannolee Dandii fi Qaqaldhiitu ture, karaa kibbaa waraana Walisoo kan naannoo Daawotu jira, karaa bahaa waraana Bachoo, waraana Shabbuu Bordee kan eenyuyyu dura ijaajjuu hin dandeenye sanitu ture, karaa kaabaa waraana Oromoo Abeebe Kuttaayee kan Boojiyaa Hasaquu fi kan Waamii Garoo ollachiisaa saniitu ture. Isaan kanaa olitti ibsaman kun moyamanii harka kennatanillee akkum jirutti Oromoota kana lafarraa doguuguun waan hin dandayamneef, sodaan Habashootaa akkaan cimaa dha ture. Kanaaf, Tulluu Boddaa irratti masshagatanii halkaanii guyyaa of-eegaa turani. Tulluu kana irra dhaabataniiti, taa'aniiti goodaa Bachoo fi Abeebe Kuttaayee fi Macca Waamii Garoo, Bodda-Bashii* Abbaa Caalaa faa keessaa waan sochowu mara towachaa of-irraa eeggatu jechaa dha. Qusee Dingee booda Habashaa akkasitti tajaajilee, gara booda immoo isaanumaan galafatame sunillee asuma waraana Walisoo kan Dandii fi Boddaa keessaayyi boojiyameeyyu.

     Booda Tulluu Boddaa isa tokko irratti bataskaana isaanii kan Aabboo jedhumu ijaarratani. Bakki bataskaanni irratti ijaarame kun bakka dur Oromoon yaa'ee Waaqa ofii itti-kadhatu ture. Bakka tolcha Boddaatu Abboo Boddaa tahe jechaa dha. Habashoonni Biyya Oromoo bakka cabsan maratti lafa Oromoon yaa'ee itti-waaqeffatu bataskaana isaanii itti-ijaarratani. Asi irraatti fakkeenyi cimaan naannoo Afran Qalloo, kan isaan harra Gabreelii Qullubbii jedhaniin sani. Bakki kun kan duraan Oromoon naannoo kanaa buqqayee bawuun achitti waqeeffatu ture. Aabboo Boddaa kun biyya Afran Walisoo guutuu keessaa bataskaana jaraa isa duraati ture.

     Booda takka turanii Boodda irraa Gooroo Dandii bayinii, bu'anii hara Dandii kan asitti Dambal Dandii jedhamu cinaatti Maaramii Dandii ijaaruun, bataskaana isaanii keessaas isa "caalu", isa gadaamii jedhamu taasifatani. Maaramii Dandii tun lafa wantaalee danuu qabdi. Lafti kun immoo kan uummata Oromoo irraa fuudhatamee ishiidhaa kenname ture. Dubbiin bataskaana Habashootaa kun, kan callaa irratti yoom dhaabata? Fakkeenyaaf: biyya Walisoo keessaa Qaqaldhii fi Dandi keessaa Oromoonni lafa qaban, kan lafuma ofii deebisanii nafxanyoota irraa bitatan gariin isaanii gibira lafaa mootummaaf miti kan galchan, Maaramii Dandiitifi malee. Warri gibira mootummaa Habashaatii galchu, jechuun Boodda, Dandii fi Qaqaldhii irraa magaalaa Giincii dhaqee gibira galcha. Warri Maaramiif gibira galchu immoo Maaramii Dandii dhaquudhani. Kunoo, bataskaani Ortodoksii Habashaa takka abbaa-lafaa takka immoo mootummaa taheeti hoomishaa fi dhiiga uummata Oromoo xuuxxachaa ture. Waayee biyya Afran Walisoo kanan filaddhee asi irratti kaaseef, dhugoo fi dhugaa qabatamaa tahe dhiyeessuun waayee Oromiyaa mara isa calaqqisiisu ibsuufani.

     Bataskaanonni duraan ijaaram kun jechuun kan akka Maaramii Dandii dureeyyii dha. Abbootii lafaatisi. Isaan akkanaa immoo Habshoonni bakka hundaattuu ijaaruu hin dandeenye. Humni yeroo san qabn isaanii hin hayyamu ture. Akkuma barreeffta kana, kutaa biraa keessatti jedhame uummanni Oromoo akka du'aa isaa bataskaana duwwaatti awwaallatu mootummaan ajajamee, dureewwan bataskaanatiin immoo maganame. Uummanni rakkannaan ofumaan warri lafa qabu lafa keenuun  bataskaana ijaarrachuu jalqabe. Baskaanni uummataan ijaarame kun hedduu hiyyeessa. Silaa ennaa san Oromoon lubbee (qeesii) hin tahuu ture, qeesii Gondorii faa dhufe wayii barbaadanii mindeessuun midhaanii fi horoo walitti buusanii kennuufi. Fakkeenyaaf: uummanni Qaqaldhii Walisoo, keessumaa: Kotoba, Kabaashee, Gafarsa, Shimala, Jawwee, Dhalata, Gareeruu, Maaruu Warra Tolaaa faa rakkannaan warri Gurree Birqii faa Lafa kennanii Garbeelii Kotobaa ijaarratani. 

     Haatahu malee, waan Maaramii Dandii bakka dur Oromoon itti-waaqeffatutti ijaarameef, waggaatti gaafa ishiin ayyaaneffatamtu "naggaftu", jechuun Furma 21 uummanni naannoo kanaa buqqayee bawuun achi dhaqa. Uummanni garri dhibbayyaa 90 (90 %) akka Amaaraatti, ayyaana warra Amaaraa kana ayyaaneffachuufii miti. Bakka saniis, Waaqa isaa sanis waan hin irraanfanneef, achi dhaquun bakka agarsiisa aadaa ofiitti jijjiirrate. Fakkeenyi kun kan Dandi yookaan biyya Afran Walisoo qofaa ilaaluu miti. Tuulamaa fi Macca Bahaa guutuu keessatti akkanuma. Oromoon akka aadaa ofiitti sirbee, akka aadaa ofiitti dhiichisee, ragadee dachee sochoosuuf, booda immoo dirree garmaamaa dhaqee gusii isaa kan raajeffatamu san gochuufi. 

     Gaafa Maaramii Dandii ayyaaneffatamtu kana karaa sirbaa fi gugsii raajidhumatu achiitti tahaa oola. Karaa lixa Qaqaldhiin Walisoo inni shimalaa fi gugsiif dhalate jedhamu warri fardaa bakka hedduutti gurmuu gurmuun, lafoon bakka hedduutti gurmuu gurmuun sirbaa, dhiichisaa; karaa kibbaa Raccee* fi Dheeraa Walisoo, karaa bahaa Boddii fi Dandi gara bahaa maqaa Bashii* jedhamuun of waamee; warri Gooroo Dandii fi Maatiin sirbaa dhichisaa ennaa dhufu waan Oromiyaa guutuu irraa namni achitti walitti yaa'e fakkata. Booda oggaa taabonni bayeetoo mana ofii san naannawuuf jedhu, Oromoon kee warra baalabbaatotaa fi nafxanyootaa yoo tahe malee, isa quba hin qabu. Booda namni tokko gadi bayee karra irraa dhaabachuun warra karra duraa fi dirree keessa dhabbatee sirbun: "maaloo yaa jarana, taabonni bayeeraa xinnoo-shii nuu obsaa!", jedha. Gariin isaanii xiqqoo obsanillee garri irra caalu kana quba hin qabuu, dhiichisaan lafa sochoosa, awwayyaa fi ragadaan qama ofii leenjisa. 

     Kana booda walqabatee lafa garmaamaa bakka itti-gugsiin tahu dhaqa. Gugsiin Oromoo inni Pirofeesar Haberland: "ija tiyyan amanuu daddhabe", jedheetoo dinqeeffatu sun hamma gala-jabbileetti itti-fufa. Oromoon lafti isaa irraa fudhatamullee, bakki waaqeffannaa isaa irraa mulqamullee, aadaan isaa abaaramee dhoowwamuuuf aggaamamullee itti-cichee aadaa fi afaan ofii qarriffoo ofiitti qabatee kunoo nuu fi dhaloota qubeetiin gaye. Egaa, nutis, dhaloonni qubees amma maal faa gochu qabna-ree? Maal maal faa gooneti Oromiyaa teenya kottee Habashoota Wayyaanee fi Habashoota biroo harkaa baasuun bakka uumamaa fi uumaan qabdu saniin, bilisummaa fi walabummaan ishii geenya-ree? Isaan akkanaa kana kutaalee kanatti aananii dhufan keessatti ilaallaa, mee hammasitti nagaa fi nageenyaan oolatii naa bulaa!

                                                                Itti-fufa ---!

============    Hubachiisa Miiljalee    = ===========

     *Maqaalee kun lachuu jechuun Bashiinis, Racceenis jechootuma Afaan Oromoo ti. Lafti dirree oggaa bokkaan itti-roobe, kan bishaan roobaa sun dafee lafa keessa hin seenetoo jira. Lafti akkanaa kun yommuu irra ijjatan miila namaa jalatti "bash bash" jedha. Bashiin kana irraayyi dhufe. Racceen immoo sagalee "bash bash" yookaan "tar tar" jedhu otoo hin taane, sagalee "rac racac" jedhamu kennu irraayyi dhufe, jedhu manguddooleen naannoo kanaa kan akka: Dilgaasaa Sobbooqaa Gaashoree, Manqar Sobbooqaa Kowalee, Kumsaa Soondhessaa Kowalee, Diroo Damee Bashanaa, Disaasaa Sobbooqaa Nyoree, Dabbabaa Gammachuu Qamalittii, Taffasaa Boodanaa Bultoo, Taaddasaa Birrii Horaa, Rafuu Dammii faa.