Taammanaa Bitimaa irraa

       Barreeffata kana kuta a sadaff aa keessatti: "Kan nama dhibu, warri Habashaa bataskaana qofatti nama awwaalladdhaa jechuun uummata abboomanii, magananis malee, bataskaanumallee bakka barbaachisutti ijaaruu fi ijaarsisuuf humni isaanii hin hayyamuuf ture. Mee isa kana fakkeenya tokko qofa Oromiyaa teenya keessaa, naannoo Afran Walisoo callaa fudhanneetoo hamma tokko haa ilaallu!", jedhameeti ture. Kunoo, amma akkuma jedhame sanitti, isa jedhame san wajjumaan ilaallaa mee qalbii fi qalbeeffata keessan natti hin qusatinaa!

        Barri isaa bara 1876 keessa. Waraanni Habashaa kan Raas Goobana Daaccii fi Dajjaach Gaarradoo (Gaarradaw) Waldee fayiin durfamu, qawwee ibiddaa mataa irraa hamma quba miilaatti hidhatee ibidda tufaa Oromoota Bachoo isaan akka nama tokkoo tahun dura goran, akka okaatti haamaa daangaa biyya Afran Walisoo dhaqqabe. Oromoonni Afran Walisoos akkuma Oromoota naannoo Oromiyaa Jid dugaleessaa& nbsp;gara akkaan irra caalanii, akkuma Oromoo Arsii fi Barentuu (Harargee) faa yeroo san seera gadaatiin of-bulchaa turani. Haatahu malee, yaanni Oromoota Gibee, inni abbootiin duulaa seera gadaa cabsuun suuta suuta gara mootoliitti of-geeddaranii sun, biyya obbolaa Walisoo Ammayyaa fi naannoo Walisoo keessaa immoo Maaruu Kormee fi Dirree Warra Beellamoo  (naannoo magaalaa Walisoo marsee jiru) faa hulluuqee galuuf, curruuqaa (daa'imaa) jiraayyu.

      Biyyi Jahan Ammayyaa fi kan Afran Walisoo waan laga Gibeetti ijjataniif, Jimma Kakaa (Jimma Abbaa Jifaar) waliin ni daangomu. Abbaan Jifaar ayyaana gaafa inni mootomee, kan waggaa waggaan ayyaaneffatamu irratti dureewwan Oromoota Ammayya fi Walisoo faa garii ni affeera ture. Jarri gaafas waayee tokkummaa Oromoo fi waayee abbootiin duulaa mootomuu faa waa haasawuun isaanii hin oolle. Tahus jarri otoo yaada kana& nbsp;lamaanuu fiixaan hin baasin, Minilik Biyya Oromoo guutuu koloneeffachuuf xiyyeeffatee ka'e san isaanitti qabe.

     Biyyi Afran Walisoo kun duraan qaama biyya Sadan Liiban ture. Sadan Liiban jechuun ilmaan Liiban Jidda Maccaa: Ammayya, Walisoo fi Kuttaaye. Biyyi Liiban kun karaa kaabaa laga Abbayyaa (Mormor) irraa kaasee, karaa kibbaatiin biyya Oromoo Sadeen Sooddoo fi Biyya Guraageetti ijjata. Karaa bahaa biyya Oromoota jahan Bachoo, Ada'a Bargaa fi Salaaletti ijjata. Karaa lixaa immoo Tulluu Jibaatiin daangeffama. Biyyi Sadan Liiban kun biyya kormi keessaa baroodu, biyya fardi keessaa himimsu, biyya galmaa fi jagnaa, biyya qaalluu fi gamnaa, biyya dhiichifni dachee sochoosu, biyya ragannii fi awwaayyaan qaama butuchu faa ture. Kaan ammallee ni jira. Biyyi kun biyya Oromoon Tuulamaa biyya Maccaa jedheetoo yaamu fi faarsu sani. Oromoonni Sadan Liiban kun karaa baa y'ee Oromoota Tuulamaatiin sheenqamaniiti ("influenced") j iru. Oromoon Sadan Liiban kun Oromoo hunda keessaa lubbuun isaa (kan irra jaalatu) Oromoo Tuulamaa fi Oromoo Jimma Abbaa Jifaari. Qoosaan jaalalaa kan Sadan Liibanii fi Tuulamni (Bacho, Sooddo fi Ada'a Bargaa faa) waliif qaban, inni daadhii isa booka wajjin magaalaawwan: Tullu Boollootti, Walisotti, Buusaatti, Barooddootti, Giincii fi Shaggar keessaa Markaatoo faatti dhangalawuuyyu kan waraabameetoo hin dhumne ture.

      Sadan Liiban kun duraan caffee gadaa tokkicha jalatti of-bulchaayyu. Odaan yaa'ii Sadan Liiban Xuqur keessaa Incinnii, bakka amma erga Oromiyaan qabatamtee asii, warri Ortodoksii Habashaa taabota isaanii kan Mikaa'ela jedhamu itti-dhaabbatan san ture. Booda keessa ilmaan Liiban kun caffee mataa-mataa ofii hundeeffachuun tokkummaan Sadan Liiban, inni akkasitti mootolii Habashaatti akka sibiilaa jabaachaa ture s un laafe. Waraanni Sadan Liiban kun akkuma waraana Torban Guduruu, Salaalee, Darraa, Afran Ab bichuu, Jahan Galaani fi Torban Walloo faa gara waggaalee dhibba sadiiyii dallaa siibilaa taheetoo waraana Habashaa ofirraayyis, Oromoota biroo irraayyis ittisaa ture. Waraana Sadan Liiban kana fayi, waraana Habashaa isa laga Abbayyaa fi laga Bashiloo cewuun gandeen gubee, loonii fi fardeen boojiyee nama rakkisu san, "erga isaan barbaadanii nutis waraana biyya isaanii geessina" jechuun Abbayya cewuun Goojjam faa keessatti kan lolaa ture. Waraana Sadan Liiban ollachiisaa sanitu bara 1598 keessa ilma mootii Habashaa isa Susiniyoos jedhamu boojiyeeyyu. Abbootii duulaa Sadan Liiban keessaa kan Susiniyoos boojiye waraana Buukkoo Kuraa ture. Buukkoo Kuraa Sadan Liiban keessaa gosa Torban Kuttaayee, Abeebe Booranaa yoo tahu, manni isaa naannoo magaalaa Amboo, ganda Goromtii keessa ture. Ammallee qacceewwan (diroowwan) jagnicha kanaa achuma G oromtii fi naannoo Afran Walisoo, baddaa  Qaqaldhii, Ilaala Warra Walgaafaa keessa jiraat u. 

      Akkuma beekamu aadaa Oromoo keessatti namni waraana irratti otoo namaaf hin ilin funuusee lola malee, erga diinni harka kennatee, erga nama boojiyee qamaa fi qalbii namootaa hin jeequ, hin tuqu. Akka warra Habashaa faa, warra Faranjii durii faa nama san akka gabraatti hin gurguratu. Kana seera gadaatu dhoowwa. Amantii Oromoo Oromeetu (Waaqeffannaatu) "laguu dha, haraamuu dha, hooda" jedheetoo dhoorka. Kanaaf, ilma Mootii Habashaa isa boojiye san abbaan duulaa, Buukkoo Kuraa caffee Sadan Liibanitti dhiyeessuun, yaa'iin sun eebbisee akka inni moggaafatu godhe. Buukkoo Kuraas, Abeebe faas akka gaafa san irraa kaasanii, gurbicha akka: ilmoo ofii, aantee ofii, lammii ofii, gosa ofii fi saba ofiitti ilaalaniif kakatani. Ilmi mootii Habashaa sunis akka: gaafa san irraa jalqabeetoo: Abeebe, Kuttaaye, Sadan Liiban, Oromoo akka lammii fi saba ofiitti ilaalu yaa'ii Sadan Liiban san keessatti kaakate. Gurbichi aannanii fi damma Oromoo dhuguun kan durii caala cime. Waggaalee saddeet Oromoo keessa akka Oromootti jiraate. Afaan Oromoos akka gaariitti barachuun kora irrattillee ka'ee lallabuu eegale. Abbaa duulaa kan waraana foollee tokkoo keessattis filamuun dirqama lammummaa fi Oromummaa ofii bayaa ture. Booda "biyya kiyya isa duriittan deebiyaa mee naa hayyamaa! Mee nas gargaaraa!", waan jedheef silaa nama garaan ka'e miilli hin taa'uu, Oromoon waliigaluun akkuma inni jedhe san godheefi.

      Inni gargaarsa gaacha fi farda Oromootiin Goojjamitti deebiyee obboleessa isaa isa qixisuu kan siree mootummaa seera malee kore san, hariyee akka aadaa isaaniitti koobiyyaa qaalaan irratti ("ambaa") hidheetoo bokkuu mootummaa Habasha fudhate. Inni erga mootummaa ofii fi wa raana ofii jabeeffatee booda, harka laateef san nyaachuun Oromootti waraana kaase. Waan waggaa sadddeet guutuu Oromoo keessa jiraatee akka Oromoo n diinaan lolu iccitii isaa bareef, sanitti dhimma-bayee Oromoo san dura isaaniif hin cabne, amma mowuu jalqabe. Mootolii fi dureewwan Amaaraa kakuu Oromoof galan cabsanii Oromootti ka'uun Susiniyoos irratti dhaabateetoo hin hafne; duudhaa isaanii tahee itti-fufe malee! Akkamitti kan biraa dhiisii Miniliki-llee kakuu Oromootaaf gale cabsee, arrabni inni isaaniif kakateen sunillee dubbachuu daddhabee nafni (dhagni) isaa laamshayee, inni waggaa hedduu akka siree irratti hafe, manguddoon Oromoo Tuulamaa fi Sadan Liiban waan jedhan gaafa biraan, bakka biraatti itti-deebiyaa mee ammaaf beektonni Oromoota Sadan Liiban, waayee Susiniyoos isa "ilma" isaanii maal faa akka jedhan gabaabinaan kanaa gaditti haa ilaallu!

      Lubbuu isaa Waaqni haa maaruu, ekeraan isaa haara haa baafattuu: Baqqalaa Magarsaa Ita'aa waayee kanaa akka armaan gadiitti natti himeeyyu. Baqqalaa Magarsaa nama naannoo Afran Walisoo, nama Wancii t i. Gamnoota Oromoo kanneen naannoo kanaa, isaan tulluu duubattillee beeku jedhaman keessaa inni isa tokko. Akkanuma abbootii biyyaa warreen akka isaan jedhanitti "erga Sidaamni biyya fudhatee" asii, "baalabbaataa" jedhamuun gadi deebifan keessaa warri isaa tokko. Walaloo geerrarsaa isa Oromoonni Sadan Liiban faa Naqamte Kumsaa Morodaa irraa kaasuun hanga Abbichuu fi Salaaleetti "caalakaa caala caalaa" jedhanii tarreessan keessaa: "Wancii Noorutu caalaa, noor jettee namaa ka'uu, hiriyaa ofii-caalaa ---" jedamutu jira. Nooruun kun Nooruu Ita'aa Golgaa Goolee, wasiila (abbeera) Baqqalaa Magarsaa ti. Abbootii duulaa, booda immoo baalabbaatota Wancii lamaan keessaa tokko Nooruu Ita'aa ture. Baqqalaa Magarsaa waayee kanaa oggaan isa gaafaddhu, otoo naaf hin deebisin gaafii tokkoon na jaanjesse. "Yaa ilma koo, qaccee Susiniyoos keessaa amma kan jiran natti himuu dandeessaa?" Ani akkan gaaficha deebisuufii hin dandeenyen it ti-hime. 

      San booda kunoo qacceen Oromoo, qacceen warra isaaf kakatee moggaafatee sun harras akka jiran natti hime. Jechuun qacceewwan  abbootii Oromoo Sadan Liiban kan bara sanii naaf tarreesse.  Garii isaanii anuu qaamaan nan beekayyu. "Nuti Oromoon waan kakuu hin ganneef, waan arraba ittiin kakanne sana hin nyaanneef, kunoo Wancitti, Qaqaldhii fi Kuttaaye Goromtii faatti hardhallee Susiniyoos sana akka Oromootti ilaalla. Isatu nu gane malee, nuti hardhallee isa hin ganne. Waan nu ganeef qacceen isaa lafarraa dhabame. Oromoon keenyammoo kunoo akkuma argitu horee lafa guutera!",  naan jedhe, beekaan biyyaa san. Mee amma gara biyya Sadan Liiban, isa dimshaashaa irraa gara biyya Afran W alisootti deebinee isa kaaneef san, waayee lafaa fi waayee warra sheexana "harkisee biyya keenya fideetti" haa ceenu.

      Waraana Minilik isa reeffa O romoota Darraa, reeffa Oromoota Kurnan Gullallee fi reeffa Oromoota Jahan Bachoo faa irra tarkaanfachuun daangaa Oromoo Afran Walisoo irra gaye san, Oromoonni Walisoo duraan dhayaniitoo ofirraa deebisanii turani. Duula isa lammaffaa irratti silaa dubbiin dubbii qawweetii, dubbii gorsituu Faranjii faayii Oromoonni Afran Walisoo moyamanii harkka kennatani. Abbootiin duulaa biyya Afran Walisoo kanneen baras waraana Minilik dura goruun ofirraa faccisaa turan kan akka: Gulummaa Lubee, Hamoosaa Tuqaa, Beellamoo Roggee, Dhugoo Bultum, Kowalee Kishiiroo Gurree, Ilaansoo Halloo Bokkuu, Waliso Coree Ginnoo, Walgaafaa Qumbii, Biichee Maammadoo, Waj-wajii Waaqayyoo, Goobana Bixoo Qorichoo fayi.  Abbootiin duulaa fi dureewwan biyyaa gariin dirree w araanaatti du'ani. Kaan Goobana Daaccii fi Gaarradoo Waldee faa mana hidhaatti naqanii boodallee garii isaanii, gara Ankoobaritti dabarfamani. Goobana Daaccii Oromoonumti isaan cabsame, Oromoon Afran Walisoo akka n amaatti dandeettii waraanaa inni qabu jaju, akka Oromootti immoo akka mukaa qottoo isa sanyii ofii ganuun sibiilatti (sibiila qottootti) hudduu gatatee muka lafarraa ciruutti kaawu sun, waan Oromoo taheef, waan aadaa Oromoon qabu beekuuf, Oromoota isaan moyamanii mana hidhaatti naqaman san, akka galgala golollisee dukkanaaye keessa simbirtuu (basaaftuu) isaa erguun: "mee dhaqaatii waan Oromoon seeyyee weeddisu dhaggeeffaddhaa" jedheetoo itti-erge. Walaloo fi yeedalloo (kiilolee) Oromoo keessaa inni "seeyyee" jedhamu kun kan yeroo cinqii, yeroo hamaa faa weeddifamu.

      Dureewwan Oromoota Afran Walisoo amma mana hidhaa warri Habashaa biyya O romoo keessatti tolfatan san keessaa, warra seeyyee seeyyessan keessaa inni tokko qaccee Buukkoo Kuraa kanaa olitti ibasamee ti. Leencichi qaccee leencaa kun Walgaafaa Qumbii jedhama. Hundumaa dursee kan seeyyee weeddise Ilaansoo Halloo, abbooti i duulaa kan biyya Afran Walisoo keessaa kan naannoo Daawoo ti. Simbirtuun Habashaa qaawa manaa keessaan waan jarri godhan ilaalaa, waan isaan jedhanimmoo dhaggeeffatuuyyu. Ilaansoo Halloo jagnichi jagna caalu, inni hamma harraattuu Oromonni Afran Walisoo gaafa nafxanyaan isaanitti goobee, addaggoomee (baalagoomee) xiiqiin isaan qabde, maqaa isaa kaasuun akka mammaaksaatti yaa'ii irrattillee himan, lappheen ciisee, garaa isaa lafatti rirriitaa, ilkaan isaa ciniinnatee:

              "Yaa orooboo battee**
              Yaa orooboo battee
              Yaa Oromoo baddee
              Yaa Oromoo baddee
              Yaa Oromoo badde!"

     Jechuun weeddise. Booda Walgaafaa Qumbii kan biyya Afran Walisoo keessaa naannoo Qaqaqldii irraa abbootii duulaa keessaa isa tokko ture, akkana jedhuun weeddise:

                "Yaa dididii galgalaa**
                 Yaa dididii galgalaa
                 Dubbii Goobana Daaccee
                 Gamni namaan hiddatuu
                  Goonni namaan dhaadatuu
                  Maal cillimiin akkanaa
                  Maal cillimiin akkanaa?"

      Simbirtuuwwan Habashaa akkuma dhagayanii fi arganitti dhaqanii Goobana faatti himani. "Walgaafaan nu wajjin haasawuu barbaada boru ganamaan gadi lakkisaa! Ilaansoo Halloo nu fixuuf dhaadataa odoo gadi hin lakkisin gara Ankoobaritti dabarsaa!, jechuun Goobana Daaccee dureewwanii fi loltuu waraana Habashaa abboome. Isaanis akkuma inni jedhe godhani. Walgaafaa Qumbii akka Goobanaan yaadetti isa wajjin haasawee waliigaluun Biyya Oromoos, Oromoos hin kennine. Lafti warra Walgaafaas fudhatameetoo lafti qeyeen isaa irra jiru, kan hamma udduu eelee geessu wayii, Qaqaldhii keessaa Shube, ganda Tulluu I laalaa, kan hamma harraattuu Ilaala Warra Walgaafaa jedhamu hafeefi. 

     Ilaansoo Halloo, ilma goota gaggabaa kan jedhamuuyyu ilma Halloo Bokkuu ture. Isa biyya ofiitii jecha biyyee diinaa irraatti, Ankoobaritti biyyeen isa nyaatte. Biyyi garuu hamma harraattuu maqaa isaa hin irraanfannee ittiin dhaadata. Is aan geerrara, isaan dhiichisa. "Maqaan baduurra luubbuun baduu wayya", inni Oromoon jedhu isa akkanaatini. Warri Ilaansoo Halloo lafa abbootii biyyaatii hafe san, isa dhibbayyaa 30 san keessaallee hin arganne. Ammoo, maqaan warra kanaa lafas, horiis, horoos, qabeenya biraas caaluun kunoo amma anallee na dubbisaa jira. Erga warri Wayyaanee Oromiyaa Ilaansoo Halloo faa harkatti galfataniillee, Oromoonni Afran Walisoo yaa'ii isaanii kan magaalaa Walisoo keessatti godhatan irratti akka warri OPDO mana barumsaa isa magaalaa Walisoo, Goobana Daaccee irraa gara Ilaansoo Hallootti geedd aramu gaafatani. Manni barumsaa kun bara Xaaliyaanii Xaaliyaanotumaan ijaarameeyyu. Booda Hayila-Sillasee fi nafxanyoonni isaa biyyoota biyya irraa dheensuun itti-baqatan, Biyya Ingilizii fi Yarusaalem faa irraa erga deebiyanii: mana barumsaa san "Raas Goobana Daaccuu, Abbaa Xigguu" jechuun moggaasani. Amma OPDO-on "keenya" ishuma tanallee, gooftolii isaa Wayyaanota sodaachuun dubbii biyyi gaafate san bishaan nyaachise.

      Waan lafti goota malee, goonnis lafa malee hin jirreef, dubbii ka'ameef san, qabiinsa lafa Oromoo isa bataskaana Habashaatiin qabamee otoo hin ibsin waa xiqqoo-shii waayee biyya Sadan Liiban, biyya Afran Walisoo faa keessaa waa isinitti himame. Kutaa itti-aanu irratti ittuma seenneti waayee lafaa fi waayee warra sheexanaan "dhufee" sanii xiinxallaa, mee nagaa fi nageenyaan naaf bulaa!

                                                          Itti-fufa! ---

=====   Mee Hubachiisa Miiljalees ilaalaa!    =======

     ** Ani walaloota tunaa fi kaneen biroo kanaan dura barreeffata tokko keessatti: xiinxaluun gara Afaan Ingiliziittis hiikuun gadi baaseen ture. Warri feetan "Tamene Bitima: On Some Oromo Historical Poems" yookaan " Oromo Oral Poetry Seen from within" mee ilaalaa!